Godt vaksen 10 år
I 2015 kunne vi lesa boka om livet til 12 kvinnheringar, alle over 90 år. Vi fekk innblikk i kva kår dei vaks opp under, korleis ungdomstida deira var, kva dei gjorde i vaksenlivet og korleis dei levde i alderdomen sin.
Det var eit vitnesbyrd om endringar i samfunn, kultur og natur. Om lærdom etter eit langt liv. Om vonde minne og om lukkelege tider som hadde vore. Og om dagen i dag, som var både meiningsfull og tilbakeskodande.
Boka heitte Godt vaksen – kvinnheringar fortel og reflekterer over livet.
Alle dei 12 som vart intervjua i boka er no døde.
Over andre boksider gav tre ulike skribentar oss også sine perspektiv på det å bli eldre.
Dette var det første bokprosjektet som far Kristian og son Kristen arbeidde med saman. Kristian intervjua og skreiv, Kristen fotograferte og designa. Saman gav dei ut boka på eige forlag.
Boka vart trykt i 600 eksemplar, utgjeven på hausten – og vart utseld til jul same året.
Ja, vi burde ha trykt opp fleire.
Det var mange som ville lesa boka som ikkje fekk tak i ho, og kvart einaste år seinare har folk kontakta oss og spurt kor dei kan få tak i boka.
Vi har ikkje vilja ta kostnaden med å trykkja fleire bøker, men har kjent at vi gjerne skulle ha gjeve fleire sjansen til å lesa om og sjå desse godt vaksne menneska.
No som boka har blitt ti år, vil vi difor publisera sakene frå bestseljaren Godt vaksen på Skimtvis.no og i nyhendebrevet. Heilt utan kostnad for deg som lesar.
Du kan også velja å støtta Skimtvis ved å kjøpa e-boka. Då får du lesa alle sakene samla i ein PDF, som du kan bla i på nettbrett, datamaskin eller telefon. Du kan kjøpa e-boka allereie no ved å klikka her:
Men alle kapitla frå boka vert publiserte på nett, gratis, eitt kapittel i veka fram til jol.
Denne veka byrjar vi med føreordet – som kjem som eit eige innlegg.
Vi vonar at tekstane frå Godt vaksen kan gle nye og gamle lesarar, og gje nokre tankar om det å veksa opp i ei anna tid, og om korleis vi ynskjer å leva våre eigne liv.
God lesnad!
Med beste helsing
Kristian og Kristen Børje
P.S:
Om du eller nokon du kjenner vil få desse tekstane rett i innboksen din, kan du leggja frå deg e-post-adressa di her: https://skimtvis.no/skimt-nyhendebrev.
Kristian i samtale med Bjørg Hellesøy i 2015. Foto. Kristen
