Ny bok om kyrkjegardane i Kvinnherad

Morten Nygård har skrive bok nummer tre om kyrkjegardane i Kvinnherad. (Foto: Marius Nissestad/Grenda)

«Kvil i fred – Små og store soger frå kyrkjegardane i Kvinnherad» er tredje og siste band i serien, som presenterer små og store soger frå kyrkjegardane i Kvinnherad. Forfattar er journalist Morten Nygård i Grenda, som har gjeve ut boka.

Denne boka omhandlar kyrkjegardane som ikkje lenger er synlege, men som like fullt utgjer ein viktig og svært spennande del av historia vår. Det er også fleire kapittel om gravplassar som ikkje er dokumenterte, og som mogleg berre er segn.

På innhaldslista står kyrkjene på Halsnøy kloster, kyrkja på Skåla, Gaut Jonsson sitt kapell på Mel, kapellet i Guddal, dei moglege kyrkjene og kapella i Sunndal, på Seim, i Omvikdalen og på Markjelke, koleragravplassane på Seim, i Omvikdalen og i Høylandsbygd, den moglege koleragravplassen på Eidsvikøy, samt sogene om gravplassen i fjellet ved Jamtaland og Den katolske kyrkja i Omshagen.

Boka tek for seg ein del historiske fakta om bygdene, kyrkjene og kyrkjegardane, men det viktigaste er å fortelja om nokon av dei som ligg gravlagde der. Her kan du bli litt meir kjend med folk som levde uvanlege liv, folk som døydde i tragediar, folk som sette spor etter seg, folk som levde nøysame liv, og folk som ofra alt for landet sin fridom.

 (Pressemelding)

Dette er Jamtøyro og Jamtalandsvatnet. Her skal eit ektepar ha gått gjennom isen og blitt gravlagde på innsida av vatnet. (Foto: Morten Nygård).