Halssvull før og no
Dette er ein anekdote om Endre Haugen (1895–1986), som var lege i Kvinnherad i heile 45 år. I boka Dokter Haugen – Lege i Kvinnherad 1934–1979 kan ein finna mange slike småhistoriar. I tillegg publiserer vi her ein heil del nye historiar som har komme til etter boka kom ut.
Eli Roseth Eik fortel om ei behandling Roald, som seinare vart mannen hennar, fekk i tenåra. Han var elev ved yrkesskulen i Omvikdalen og skulle opp til eksamen, men hadde så frykteleg vondt i halsen. Med den ventande eksamen i tankane kunne han ikkje bry seg om det. Men om søndagen vart det så ille at Haugen måtte tilkallast.
Dokteren kika i halsen og konstaterte at her måtte noko gjerast. Roald vart plassert i ein låg lenestol, av den typen som var vanleg tidleg på 60-talet. Eldstebroren, Leohnard, vart plassert bak stolen for å halda hovudet, og ordren frå Haugen var klar: «Du må holde hodet hardt så han ikke rører seg. Da kan jeg skjere feil». Svullen vart snitta, materien reinska vekk og Haugen var nøgd.
– Dette vil gå bra. Du kan bare møte til eksamen.
Med ein god dose penicillin vart eksamen avvikla i ein noko sløv tilstand dagen etter.
Eli Roseth Eik legg til at då svigerdotter deira mange år seinare fekk halssvull, vart ho sendt til Bergen med ambulanse og operert på Haukeland.
– Ja, tidene hadde endra seg, avsluttar Eli.
