Ikkje tid å venta!
Dette er ein anekdote om Endre Haugen (1895–1986), som var lege i Kvinnherad i heile 45 år. I boka Dokter Haugen – Lege i Kvinnherad 1934–1979 kan ein finna mange slike småhistoriar. I tillegg publiserer vi her ein heil del nye historiar som har komme til etter boka kom ut.
Åsmund Kåre Rørvik fortel ei historie etter mor si. Ho voks opp i Kvednavikjo i Uskedalen, og hendinga er derifrå. Ein buss var på veg utover og hadde stogga på bakketoppen ved Vodlen for å ta på passasjer, medan Haugen kom i stor fart i bilen sin på veg utover, han òg.
I staden for å venta nokre sekundar på bussen, vrengte han bilen ut på grasbakken på nedsida for å køyra forbi. Bakken skråna ned mot eit lite stup ved sjøen, og bilen ville sjølvsagt den vegen på det glatte og våte graset.
Dette kunne ha gått skikkeleg gale, men ved mobilisering av passasjerar og naboar fekk dei hjelpt han opp att på vegen. Han sa ikkje eit ord, men mold og grus spruta rundt dekka då han for som ei pil vidare.