Fjerna feittklump
Dette er ein anekdote om Endre Haugen (1895–1986), som var lege i Kvinnherad i heile 45 år. I boka Dokter Haugen – Lege i Kvinnherad 1934–1979 kan ein finna mange slike småhistoriar. I tillegg publiserer vi her ein heil del nye historiar som har komme til etter boka kom ut.
Lars Næs fortel at far hans ein gong fekk ein feittklump i hovudet. Dette nemnde han for Haugen, og dokteren føreslo at han kunne koma innom kontoret klokka 6 ein morgon, så kunne han sjå på det.
Tidleg ein morgon var pasienten på plass til avtalt tid, og dokteren gjekk straks i gang med å fjerna klumpen. Han skar og skrapa, sydde, bandasjerte og plastra. Då han var ferdig sa han på Haugen-vis:
– Nu kan du gå på jobb på Skåluren klokken syv!
Sjukemelding var sjølvsagt ikkje nemnt.
Det høyrer med til historia at då stinga skulle takast ei vekes tid etterpå, var Haugen vekke av ein eller annan grunn, og søstera vikarerte. Då ho tok av bandasjen, let ho om at han kunne no ha sydd litt finare.