Vanskeleg fødsel
Dette er ein anekdote om Endre Haugen (1895–1986), som var lege i Kvinnherad i heile 45 år. I boka Dokter Haugen – Lege i Kvinnherad 1934–1979 kan ein finna mange slike småhistoriar. I tillegg publiserer vi her ein heil del nye historiar som har komme til etter boka kom ut.
Lars Næs kom til verda heime i 1963, sidan fødselen kom litt brått på. Det var ein komplisert fødsel så Haugen var på plass saman med jordmor Herborg Øvrehus. I tillegg var ei tante av Lars der og hjelpte til.
Haugen såg at fødselen måtte skje med tang, og han visste at det då kunne vera hardt å vera til stades. Difor vende han seg til tanta til Lars og sa vennleg:
– Klarer du dette, da? Viss ikke må du bare gå.
Tanta vart verande, og fødselen enda godt, men historia viser kor omtenksam dokter Haugen var.