«Operasjon tånagl»
Dette er ein anekdote om Endre Haugen (1895–1986), som var lege i Kvinnherad i heile 45 år. I boka Dokter Haugen – Lege i Kvinnherad 1934–1979 kan ein finna mange slike småhistoriar. I tillegg publiserer vi her ein heil del nye historiar som har komme til etter boka kom ut.
Som barn var Gudrun Røssland Enæs ofte plaga med inngrodd nagl på stortåa. Dette resulterte i ein del turar til dokter Haugen, og han fiksa det ofte med å ta bort nagla.
Ein av gongene han gjorde dette, hugsar Gudrun ekstra godt. Ho møtte opp på kontoret i Rosendal, og då dokteren var klar til å «operera», skulle han bedøve tåa. Lynkjapt stakk han sprøyta gjennom tåa og ned i golvet.
Den rolege kommentaren Haugen kom med då, har festa seg godt i minnet til Gudrun:
– Vi må nok stikke en gang til, for jeg tror gulvet fikk mesteparten av bedøvelsen!